小Con私房菜: 自家制蘿蔔榚

自家制蘿蔔榚好味之處都不用多說, 試過都無再出街買了, 除非別人送我的, 已經第三年整蘿蔔榚了, 一直都沒有記下食譜, 因為次次都整到打仗咁, 又怕寫得唔好, 但今年決定要寫一寫出來分享, 圖文並茂希望大家跟著我的食譜都能做到好味既蘿蔔榚^^

今次廚房來了兩個好幫手就係bosch 廚師機同埋Miele 蒸爐, 有佢地做得比較快一點, 但沒有它們都一樣做到好味既蘿蔔榚的

除左紀錄整個過程, 還分享一下煎蘿蔔榚既心得, 切蘿蔔榚有人喜歡細細舊 - 香脆口感, 有人喜歡切長方形 - 有質感, 有人喜歡切條 - 容易食, 煎既時間要跟據切既大細來煎, 如果唔係好易內心凍外面焦了

我用黑鍋煎, 需要油多一點, 鍋燒得夠紅就沒有問題, 如沒有黑底鍋可以用易潔平底煎pan, 用細火慢煎都一樣ok, 煎的時間唔想材料掉出來, 記得唔好成日反轉, 煎好一邊才反, 煎的時候試一試移一移如沒有痴住就即係已煎好可以反了

　　
呢個就係其中一個好幫手 -蒸爐, 可以一次過蒸3底6吋圓形, 還有空間放多幾盒長形盤呀~

好啦, 準備好晒材料就可以開工啦, 今次整兩底6吋圓底, 用3斤蘿蔔, 如整6斤將之乘二就可以了

材料: 白蘿蔔3斤(1斤=604g), 粘米粉250g, 粟粉40g, (蠟腸2條, 潤腸1條, 元貝5粒, 蝦米約20g)

調味: 冰糖, 胡椒粉, 鹽, 玫瑰露

做法: 1) 將元貝浸水至軟身, 撕碎後連水放入微波爐叮1分鐘(留水), 蝦米略浸後切粒(留水), 蠟腸潤腸拖一拖熱水(軟一點易切)切粒

2) 將所有才料隔水後, 燒熱鑊, 落1湯匙油, 將全部落鑊炒至有香味, 落1湯匙玫瑰露, 炒一會拿起備用.

3) 蘿蔔一半切條約(8mm 粗), 一半刨絲, 蘿蔔水隔起備用 (第二個好幫手出場bosch 廚師機配以下配件, 將材料切半放入機, 約1分鐘便可切1斤蘿蔔條)

4) 量好粘米粉和粟粉, 之前留下的水(蝦米水, 元貝水, 蘿白水) 加埋約200ml水份(如不夠200ml可以加點清水), 攪至粉團狀

5) 用回之前爆材料的鑊, 落蘿白絲炒一陣加入少許冰糖煮至出水

6) 將蠟味材料留1/3, 其他倒入蘿蔔中炒, 加入1茶匙鹽及胡椒粉(可根據口味落份量, 但注意蠟味本身已有味道, 記得試味)

7) 將粘米粉漿加入, 轉細火, 炒至粉漿粘實材料(如太杰痴唔實材料可以逐少加入蘿白水兜均, 亦不能太稀)

9)榚盤洗乾淨抹乾, 塗點油, 將炒好的材料倒入, 鋪平(如不平蒸完會凹凸不平一切就碎), 放回之前留下的蠟味在面, 最後放一點栗粉水在面, 可以痴實材料在面不會掉下

10) 滾起水, 用入爐保鮮紙或錫紙蓋著, 中火蒸約1.5小時(中途會乾水要打開蓋加水要蒸耐一點), 如用Miele 100度1小時

11) 蒸好後, 放涼最少3小時, 完全沒有熱力可蓋上蓋放入雪櫃保存

P.S 1) 蒸蘿蔔榚時蓋上錫紙防止倒汗水流入榚內令糕過濕

2) 自家制蘿蔔糕通常放到一至兩星期, 如有叔味就是已變要掉了, 所以預備送比朋友的, 要就住時間了

3) 揀靚蘿蔔在農曆新年前一個月已經好甜, 選一些沒有爆開, 表面沒有根, 夠重量水份夠!

------------------------------------------------------------------------------------------------

如喜歡我的blog 可以到我的Facebook專頁like 一下^^ 謝謝!

小Con私房菜